小班教學提升教學質素?

近日啊葉太話小班教育好, 所以大力支持．

我都覺得聽落順耳，講出來大方有型！以前除咗負責俾錢嘅教育局官員外，教育界嘅無論學生，家長，老師，校長，校工，都話小班好應該快速實施．道理好似好簡單，同樣嘅資源（以老師為單位）分俾少ｄ同學，春風化雨，真係老師嘅口水都吸收多ｄ！

仲記得以前讀書時，４０幾５０人一班，坐係遠嘅同學如果唔帶望遠鏡，真係預咗你唔聽書，唔使睇黑板咁．所以老師都會關照吓ｄ乖學生，俾佢坐近少少．感同身受，自然覺得要支持．．．．．

但係依家真實情況係點？

就以灣仔區小學一覽上資料為例：２２間政府，津貼，私立小學，一班人數少於３０人佔１２間（多過半數），３０至４０人有７間，超過４０人嘅得３間．

咁唔通小班教育經已實現？！起碼係灣仔實現！

細心睇睇，邊幾間學校仲提供ｄ咁惡劣嘅環境呢？－－＞　馬利曼，華仁，聖保祿學校（小學部）！嘩嘩！ｄ家長恨到流晒口水都入唔到嗰幾間！

如果葉太建議是啱嘅，咁呢幾間名校咪應該好唔掂，教育質素低落？

定係政客覺得果ｄ市民多數贊成，慷他人之慨嘅忽然教育家之言？
對嗰ｄ無能力教好學生而受家長用腳投反對票嘅學校，我地係唔係仲要俾多ｄ資源佢保住份工？
佢理想中嘅小班究竟有幾小？
３０人？半數已經係囉噃．．．．
２０人？使唔使呀？

好想入以上大班教育嗰ｄ家長點算呀，得番２０個位？
呀補習天王ｄ學生傻架，俾錢睇錄影帶都去？教得唔好一對一都未必有用．